Հայէկոնոմբանկն ամփոփել է Զինվորի տան հետ 2025թ. սոցիալական ծրագիրը

Ամենօրյա հոգածություն եւ շոշափելի արդյունքներ. Հայէկոնոմբանկն ու Զինվորի տունը ներկայացնում են մեկամյա նախաձեռնության արդյունքները: 

2025թ. բանկի տարեկան ժողովին կորպորատիվ պատասխանատվության շրջանակում հայտարարվեց Զինվորի տան հետ կարեւոր ծրագրի մեկնարկի մասին, որի համար հատկացվեց 50 մլն դրամ: Ծրագիրը 2 հիմնական բաղադրիչ ուներ. առաջինը կրթական ծրագիր էր զինհաշմանդամների համար՝ բանկում աշխատանքի անցնելու հնարավորությամբ, իսկ երկրորդ բաղադրիչն ուղղված էր Զինվորի տան թողունակության մեծացմանը՝ ստացիոնար բուժման հնարավորությունների ավելացմամբ։ 

Կրթական ծրագրի շրջանակում՝

•    շուրջ 30 շահառու անցել է ընդհանուր 93 ժամ տեւողությամբ մասնագիտական վերապատրաստում, որը ներառել է օտար լեզուների, համակարգչային հմտությունների, «փափուկ» հմտությունների (soft skills) դասընթացներ եւ բանկային գործի վերաբերյալ սեմինար-քննարկումներ,

•    14 մասնակից հետաքրքրված է եղել բանկում աշխատանքի անցնելու հնարավորությամբ,

•    7 մասնակից հաջողությամբ ներգրավվել է պրակտիկայի ծրագրում,

•    4 շահառու շարունակել է վճարովի ստաժավորումը բանկի Գլխամասային գրասենյակում եւ մասնաճյուղերում,

•    նոր հաստիքների առկայությանը զուգահեռ՝ ծրագրի մասնակիցների ներգրավումը բանկի թիմում շարունակվելու է:

Ենթակառուցվածքների բարելավման շրջանակում՝

•    ամբողջացվել եւ կարգավորվել է շենքի հակահրդեհային համակարգը՝ որպես կարեւոր անվտանգության բաղադրիչ, 

•    արդիականացվել է 6 տոննա տարողությամբ ջրի ռեզերվուարի ամբողջական համակարգը, փոխարինվել է շենքի ջեռուցման եւ տաք ջրի համակարգի գլխավոր պոմպը,

•    կենտրոնի վիրաբուժական եւ վերականգնողական բաժանմունքները համալրվել են նորագույն բժշկական սարքավորումներով եւ գործիքներով,

•    ձեռք է բերվել Hongqi մակնիշի էլեկտրական ավտոմեքենա, որը ծառայում է շահառուների կարիքներին,

•    իրականացվել են լայնածավալ նորոգման եւ կառուցապատման աշխատանքներ:

 

«Այս ծրագիրը Զինվորի տան հետ Հայէկոնոմբանկի առաջին համագործակցությունն էր, եւ կարճ ժամանակահատվածում արձանագրել ենք իրապես շոշափելի արդյունքներ: Մենք առանձնակի ուշադրությամբ եւ հոգածությամբ ենք իրականացրել այս ծրագիրը՝ կարեւորելով հայրենիքի պաշտպանների համար առավել անվտանգ ու հարմարավետ միջավայրի ձեւավորումը, ինչպես նաեւ նրանց մասնագիտական ինտեգրումն ու կայուն աշխատանքով ապահովումը», - նշել է Հայէկոնոմբանկի Գործադիր տնօրենի գործառնական գծով տեղակալ Վահե Ղազարյանը: 

«Հայէկոնոմբանկի շնորհիվ Զինվորի տունը կարողացավ լուծել երկարաժամկետ խնդիրներ: Թե՛ կրթական, թե՛ վերանորոգման եւ թե՛ մյուս հարցերը, որ լուծում ստացան բանկի աջակցության շնորհիվ՝ էական փոփոխություններ են ենթադրում զինհաշմանդամների կյանքում եւ Զինվորի տան աշխատանքներն առավել որակյալ կազմակերպելու հարցում: Պատերազմից այսքան տարի անց սոցիալական նման մեծ պատասխանատվությունը բացառիկ երեւույթ է»,- ասել է Զինվորի տան տնօրեն Հայկուհի Մինասյանը:

Հայէկոնոմբանկը վերահսկվում է ՀՀ Կենտրոնական բանկի կողմից: