Նոր համագործակցություններ և համատեղ հիմնադրամ․ ի՞նչ է կփոխվի հանքարդյունաբերության ոլորտում
Հայաստանի հանքարդյունաբերության և մետալուրգիայի ասոցիացիայի (ՀՀՄԱ) տարեկան հաշվետու համաժողովի շրջանակում Երևանում ստորագրվել են համագործակցության երկու նոր հուշագրեր՝ ՀՀ տարածքային կառավարման և ենթակառուցվածքների նախարարության և Հայաստանի երկրաբանների միության հետ։
Փաստաթղթերը ստորագրել են ՀՀ ՏԿԵ նախարար Դավիթ Խուդաթյանը, Հայաստանի երկրաբանների միության նախագահ Վահան Գրիգորյանը և ՀՀՄԱ նախագահ Վարդան Ջհանյանը։
Համաժողովի ընթացքում ներկայացվել են ոլորտում իրականացված աշխատանքները, արձանագրված ձեռքբերումներն ու զարգացման հեռանկարները։ Քննարկվել են նաև միջազգային համագործակցության ընդլայնման և ոլորտային բարեփոխումների նոր ուղղությունները։
ՀՀ ՏԿԵ փոխնախարար Ասատուր Վարդանյանի խոսքով՝ նոր հուշագիրը կխթանի պետության, մասնավոր հատվածի և գիտական հանրության միջև համագործակցությունը։ Նա տեղեկացրել է, որ նախատեսվում է ստեղծել նաև համատեղ հիմնադրամ, որը հնարավորություն կտա առավել համակարգված իրականացնել հետազոտական և վերլուծական աշխատանքներ, գնահատել բնական պաշարների օգտագործման արդյունավետությունը և բարձրացնել ոլորտի ներդրումային գրավչությունը։
ՀՀՄԱ նախագահ Վարդան Ջհանյանը նշել է, որ վերջին երկու տարիներին ասոցիացիան մեծապես ընդլայնել է միջազգային համագործակցությունը՝ գործընկերային կապեր հաստատելով ԱՄՆ-ի, Կանադայի և եվրոպական կազմակերպությունների հետ։ Նրա խոսքով՝ կարևոր ձեռքբերումներից է նաև ասոցիացիայի անդամակցությունը Հանքարդյունաբերության և մետաղների միջազգային խորհրդին (ICMM)։
Հայաստանի երկրաբանների միության նախագահ Վահան Գրիգորյանը համագործակցության հուշագիրը գնահատել է որպես ռազմավարական քայլ, որը կնպաստի գիտական և մասնագիտական ներուժի համախմբմանը, համատեղ գիտահետազոտական ծրագրերի իրականացմանն ու միջազգային համագործակցության ընդլայնմանը։
Համաժողովի շրջանակում ներկայացվել են նաև «Mining Armenia Forum 2026» միջազգային ֆորումի առաջիկա ծրագրերը։ Ֆորումը կանցկացվի հոկտեմբերի 16-17-ը՝ ընդլայնված ձևաչափով և միջազգային նոր գործընկերների մասնակցությամբ՝ անմիջապես նախորդելով Երևանում կայանալիք COP17-ին։