Աշխարհի խոշորագույն ընկերությունները նոր ռեկորդներ են սահմանել Forbes Global 2000 վարկանիշում

Forbes Global 2000 ամենամյա նոր վարկանիշում ընդգրկված աշխարհի խոշորագույն հրապարակային ընկերությունները նոր ռեկորդներ են սահմանել եկամուտների, շահույթի, ակտիվների և շուկայական կապիտալիզացիայի ցուցանիշներով։

Forbes-ում նշել են, որ, չնայած առևտրային պատերազմներին, աշխարհաքաղաքական լարվածությանը, էներգակիրների բարձր գներին և գնաճին, աշխարհի խոշորագույն ընկերությունները շարունակում են կայուն աճ գրանցել։ Այս տարի արդեն 24-րդ անգամ հրապարակվող Global 2000 վարկանիշը ռեկորդային արդյունքներ է ցույց տվել բոլոր չորս հիմնական չափանիշներով։

«Աշխարհի առաջատար ընկերությունների համախառն տարեկան վաճառքի ծավալը կազմել է 56 տրիլիոն դոլար (6%-ով ավելի, քան նախորդ տարվա ռեկորդը), շահույթը՝ 5.5 տրիլիոն դոլար (+13.9%), իսկ ակտիվները՝ 272 տրիլիոն դոլար (+12.9%)։ Ամենատպավորիչն այն է, որ Global 2000-ի մասնակից ընկերությունների ընդհանուր շուկայական կապիտալիզացիան նախորդ տարվա ռեկորդի համեմատ աճել է 31.8%-ով՝ բաժնետերերի արժեքն ավելացնելով ավելի քան 30 տրիլիոն դոլարով», – ասվում է հաղորդագրության մեջ։

Աճի գլխավոր շարժիչ ուժը դարձել են արհեստական բանականության ոլորտի ընկերությունները։ Կիսահաղորդիչների արտադրողների, համակարգչային սարքավորումների արտադրողների և ծրագրային ապահովման մշակողների (այդ թվում՝ Microsoft-ի և Alphabet-ի) ընդհանուր կապիտալիզացիան գրեթե կրկնապատկվել է՝ 23.9 տրիլիոն դոլարից հասնելով 41.4 տրիլիոն դոլարի։ Forbes-ի տվյալներով՝ այս ոլորտին բաժին է ընկել վարկանիշի մասնակիցների ընդհանուր շուկայական կապիտալիզացիայի աճի 57%-ը։

Սակայն նույնիսկ արհեստական բանականության բումի պայմաններում Global 2000 վարկանիշում շարունակում են գերակշռել բանկերը՝ թե թվով, թե ակտիվների ծավալով։

Վարկանիշի առաջին հորիզոնականը չորրորդ տարին անընդմեջ զբաղեցնում է ամերիկյան JPMorgan Chase բանկը՝ 4.9 տրիլիոն դոլարի ակտիվներով։ Երկրորդ տեղում Amazon-ն է՝ 742.8 միլիարդ դոլարի հասույթով և 2.8 տրիլիոն դոլարի շուկայական կապիտալիզացիայով։ Երրորդ տեղը զբաղեցրել է Berkshire Hathaway ներդրումային կոնգլոմերատը։

Չորրորդ հորիզոնական է բարձրացել արհեստական բանականության խոշորագույն մատակարարներից մեկը՝ Alphabet-ը, որը բարելավել է իր դիրքը հինգ աստիճանով։ Ընկերության շուկայական կապիտալիզացիան կազմել է 4.8 տրիլիոն դոլար։ Հինգերորդ տեղը զբաղեցրել է Սաուդյան Արաբիայի պետական նավթագազային Saudi Aramco ընկերությունը՝ 1.8 տրիլիոն դոլարի կապիտալիզացիայով։

Առաջին տասնյակում ընդգրկվել են նաև Bank of America-ն, Microsoft-ը և Չինաստանի երեք խոշորագույն բանկերը։

2026 թվականի վարկանիշում ամենամեծ առաջընթացն արձանագրել են արհեստական բանականության ոլորտում գործող ընկերությունները։ Nvidia-ն զբաղեցրել է 27-րդ տեղը՝ դառնալով ցանկի ամենաթանկ կիսահաղորդիչների արտադրողը՝ 5.5 տրիլիոն դոլար շուկայական կապիտալիզացիայով։ SK Hynix-ը բարձրացել է 107 հորիզոնականով՝ զբաղեցնելով 48-րդ տեղը, իսկ ամպային արհեստական բանականության CoreWeave ընկերությունը մեկ տարվա ընթացքում առաջ է շարժվել միանգամից 706 հորիզոնականով՝ զբաղեցնելով 1093-րդ տեղը։

Աշխարհագրական բաշխվածությամբ առաջատարը շարունակում է մնալ ԱՄՆ-ն․ վարկանիշում ընդգրկվել է 593 ամերիկյան ընկերություն, մինչդեռ մեկ տարի առաջ դրանց թիվը 612 էր։ Երկրորդ տեղում Չինաստանն է՝ 300 ընկերությամբ, իսկ Հոնկոնգի հետ միասին «Մեծ Չինաստանի» ներկայացուցիչների թիվը հասնում է 340-ի։ Երրորդ տեղում Ճապոնիան է՝ 179 ընկերությամբ, որին հաջորդում են Մեծ Բրիտանիան (67), Հարավային Կորեան (66), ինչպես նաև Կանադան և Հնդկաստանը՝ յուրաքանչյուրը 64 ընկերությամբ։

Միաժամանակ ԱՄՆ-ն շարունակում է պահպանել առաջատար դիրքը նաև ընդհանուր շուկայական կապիտալիզացիայի ցուցանիշով՝ շուրջ 67.9 տրիլիոն դոլար, ինչը գերազանցում է վարկանիշում ընդգրկված բոլոր ընկերությունների ընդհանուր շուկայական արժեքի կեսը։