ԵՆԱԲ գլխավոր տնօրեն․ Միջին միջանցքի զարգացման համար կպահանջվի մոտ 28 մլրդ դոլար
Միջին միջանցքի լիարժեք գործարկման համար կպահանջվի մոտ 28 մլրդ ԱՄՆ դոլար։ Ուստի ենթակառուցվածքները շարունակում են մնալ թիվ մեկ առաջնահերթությունը։ Ինչպես հաղորդել է APA-ն, այս մասին Բաքվում Զարգացման իսլամական բանկի տարեկան հանդիպումների շրջանակում կազմակերպված «Միջին միջանցքի ֆինանսավորումը՝ հանուն կայուն տրանսպորտի և առևտրի» նստաշրջանում հայտնել է Ենթակառուցվածային ներդրումների ասիական բանկի գլխավոր տնօրեն Սյաոհուն Յանը։
Նրա խոսքով՝ առաջին գերակայությունը բանկային ֆինանսավորման համար պիտանի նախագծերի՝ «bankable projects»-ի ֆինանսավորումն է։ «Առաջիկա 15 տարում Միջին միջանցքի համար կպահանջվի մոտ 28 մլրդ ԱՄՆ դոլար։ Ուստի ենթակառուցվածքները շարունակում են մնալ թիվ մեկ առաջնահերթությունը։ Երկրորդ առաջնահերթությունը գործառնական արդյունավետությունն է։ Միջին միջանցքը ներդրողների և բեռնափոխադրողների համար գրավիչ դարձնելու ամենակարևոր գործոններն են դրա հուսալիությունն ու կանխատեսելիությունը։ Եթե նախկինում փոխադրումները տևում էին մոտ մեկ ամիս, ապա այժմ այդ ժամկետը կրճատվել է մինչև մոտ 18 օր։ Սակայն դա դեռևս բավական երկար է», — նշել է նա։