Հայաստանի ՀՆԱ-ն առաջին եռամսյակում աճել է 4 տոկոսով

Հայաստանի Հանրապետության վիճակագրական կոմիտեն հրապարակել է 2026 թվականի առաջին եռամսյակի համախառն ներքին արդյունքի նախնական տվյալները: Ըստ հրապարակված զեկույցի՝ ընթացիկ տարվա առաջին եռամսյակում Հայաստանի ՀՆԱ-ի ծավալն ընթացիկ գներով կազմել է 2 305 822.5 մլն դրամ:

Տնտեսական աճի ցուցանիշը նախորդ տարվա նույն ժամանակաշրջանի նկատմամբ կազմել է 104.0 տոկոս: Զեկույցում ներկայացված է նաև մեկ շնչի հաշվով համախառն ներքին արդյունքը, որը կազմել է 744 174 դրամ՝ համարժեք լինելով 1 967 ԱՄՆ դոլարին կամ 1 681 եվրոյին:

ՀՆԱ-ի կառուցվածքում ամենամեծ մասնաբաժինն ապահովել են առևտրի և ծառայությունների ոլորտները՝ կազմելով ընդհանուրի 67.7 տոկոսը կամ 1 560 335.7 մլն դրամ: Արդյունաբերության, ներառյալ էներգետիկայի տեսակարար կշիռը կազմել է 16.6 տոկոս: Առանձնահատուկ բարձր ակտիվություն է արձանագրվել շինարարության ոլորտում, որտեղ ծավալի ինդեքսը նախորդ տարվա առաջին եռամսյակի համեմատ կազմել է 120.6 տոկոս: Միևնույն ժամանակ, գյուղատնտեսության, անտառային տնտեսության և ձկնորսության ոլորտում նկատվել է անկում․ ծավալի ինդեքսը կազմել է 98.4 տոկոս:

Վերջնական սպառման ծախսերը կազմել են ՀՆԱ-ի 93.5 տոկոսը կամ 2 154 536.7 մլն դրամ, որի գերակշիռ մասը բաժին է ընկնում տնային տնտեսությունների սպառմանը: Ապա ապրանքների և ծառայությունների արտահանումն առաջին եռամսյակում կազմել է 1 178 770.7 մլն դրամ, իսկ ներմուծումը՝ 1 374 369.6 մլն դրամ: Այս ցուցանիշների արդյունքում արտահանման և ներմուծման սալդոն ձևավորվել է բացասական՝ կազմելով -195 598.9 մլն դրամ: