Հայաստանի և ԱՊՀ մյուս երկրների բեռնատարների վարորդները պարտավոր կլինեն ՌԴ մուտք գործելու նպատակի հայտարարություն ներկայացնել
Ռուսական լրատվամիջոցների փոխանցմամբ՝ Հայաստանի և Վրաստանի բեռնատարների վարորդները պարտավոր կլինեն ներկայացնել հայտարարություն Ռուսաստան մուտք գործելու նպատակի վերաբերյալ։
Ռուսաստանի ներքին գործերի նախարարության խոսնակ Իրինա Վոլկը նշել է, որ ԱՊՀ երկրներից և Վրաստանից բեռնատարների վարորդները պարտավոր կլինեն ներկայացնել լրացուցիչ փաստաթղթեր։
ՌԴ նախարարության խոսնակի խոսքով՝ ԱՊՀ երկրներից և Վրաստանից բեռնատարերի վարորդները, որոնց համար Ռուսաստանի կառավարությունը երկարաձգել է այնտեղ ժամանակավոր մնալու ժամկետը մինչև 180 օր, պարտավոր կլինեն RuID-ի միջոցով ներկայացնել էլեկտրոնային հայտարարություն՝ նշելով Ռուսաստան մուտք գործելու և երկրում մնալու նպատակը։ Նրանք նաև պարտավոր կլինեն կցել իրենց անձնագրերի և միջազգային բեռնատարի վարորդի մասնագիտական գործունեությունը հաստատող փաստաթղթերի պատճենները։
Այս որոշումն ուժի մեջ է մտնում 2026 թվականի հունիսի 30-ից։
Հիշեցնենք, որ Ռուսաստանի վարչապետ Միխայիլ Միշուստինի ապրիլի 27-ի հրամանագրով Ռուսաստանի կառավարությունը երկարաձգել է ԱՊՀ երկրներից և Վրաստանից բեռնատարների վարորդների Ռուսաստանում ժամանակավոր մնալու ժամկետը մինչև 180 օր մեկ օրացուցային տարվա ընթացքում։ Լուրը հայտնում է apsny.ge-ն։