Երևանի Նորագյուղ թաղամասում գտնվող մի տարածք ճանաչվել է որպես հանրային գերակա շահ
Երևանի Կենտրոնական վարչական շրջանի Նորագյուղ թաղամասում գտնվող մոտ 81 հեկտար տարածքը ճանաչվել է որպես հանրային գերակա շահ։ Համապատասխան որոշումը կայացվել է կառավարության ապրիլի 23-ի նիստում։
Տարածքը սահմանակից է Ծովակալ Իսակովի և Մոնթե Մելքոնյան պողոտաների տրանսպորտային հանգույցին, ինչպես նաև Պասկևիչի բլրի տարածքին և Հրազդան գետի կիրճին։
Այս որոշմամբ հիմք է դրվում քաղաքաշինական խոշոր նախագծի։ Դրա համաձայն՝ այս տարածքում կստեղծվի բազմաֆունկցիոնալ միջազգային կենտրոն, որը կներառի «Երևանի կենտրոն» բիզնես համալիրը, դիվանագիտական շենքերը, մշակութային կենտրոնները, բնակելի շենքերը և հանգստի գոտիները։
Նախատեսվում է նաև Իսակովի և Արշակունյաց պողոտաները միացնող ճանապարհահատվածի (Մելքոնյան փողոցի շարունակություն) կառուցումը։ Ծրագրի օպերատորներն ու գույքի գնորդներն են DT Construction-ը և DT Development-ը։
Օտարված գույքի համար փոխհատուցումը սահմանվում է շուկայական արժեքի գումարած լրացուցիչ 30%։