Մաքսատուրքից ազատվեց մի քանի ընկերություն
Կառավարությունն իր այսօրվա՝ ապրիլի 23–ի նիստում գերակա ոլորտում իրականացվող ներդրումային ծրագրի շրջանակներում ներմուծման մաքսատուրքից ազատեց «ԱԳՐՈՆԵՍԹ» սահմանափակ պատասխանատվությամբ ընկերությանը
Այս ընկերության կողմից ներմուծվող հումքը և սարքավորումները նախատեսվում են օգտագործել գերժամանակակից ջերմոցի կառուցման համար, որտեղ կաճեցվեն լոլիկներ։ Ծրագիրն իրականացվելու է Կոտայքի մարզում։ Ընկերությունը հիմնադրվել է 2026 թվականին։
Ծրագրի շրջանակներում նախատեսվում է իրականացնել ընդհանուր շուրջ 11․1 մլրդ դրամի ներդրում հումքի ու սարքավորումների ձեռքբերման, շինարարական աշխատանքների իրականացման համար։
Ներդրումային ծրագրի շրջանակներում, մինչև 2027 թվականը ընկած ժամանակահատվածում, նախատեսվում է ստեղծել 140 նոր աշխատատեղ՝ 200 հազ դրամ միջին ամսական աշխատավարձով։
Արտոնություն ստանալու համար ներկայացված ապրանքների արժեքը կազմում է 8.5 մլրդ դրամ: Մաքսատուրքից ազատման արտոնությունը գնահատվում է 550 մլն դրամ։
Մեկ այլ որոշմամբ մաքսատուրքից ազատվեց «ՎԱՆՍԵՎԱՆ» սահմանափակ պատասխանատվությամբ ընկերությունը, որի կողմից ներմուծվող հումքը և սարքավորումները նախատեսվում է օգտագործել գինու արտադրության համար։ Արտադրությունն իրականացվելու է Արմավիրի մարզում։ Ընկերությունը հիմնադրվել է 2014 թվականին։
Ծրագրի շրջանակներում նախատեսվում է իրականացնել 170.9 մլն դրամի ներդրում հումքի և հիմնական միջոցների ձեռքբերման համար։
Ներկայումս առկա է 4 հիմնական (ոչ սեզոնային) աշխատատեղ՝ 160 հազ դրամ միջին ամսական աշխատավարձով։ Ներդրումային ծրագրի շրջանակներում, մինչև 2027 թվականը ընկած ժամանակահատվածում, նոր աշխատատեղերի ստեղծում չի նախատեսվում։
Արտոնություն ստանալու համար ներկայացված ապրանքների արժեքը կազմում է 170.9 մլն դրամ: Մաքսատուրքից ազատման արտոնությունը գնահատվում է 16.9 մլն դրամ։