Անցած աշխատանքային շաբաթը Շրջակա միջավայրի նախարարության ենթակա կառույցներում
Անցած աշխատանքային շաբաթը Շրջակա միջավայրի նախարարության ենթակա կառույցներում
«Հայանտառ» ՊՈԱԿ-ում
Շարունակվում են 2025 թվականի անտառտնկման աշնանային աշխատանքները:
2025-ին իրականացվող անտառմշակույթների հիմնումը նախատեսված է ընդհանուր առմամբ 735 հա տարածքում, որից
պետական բյուջեի ֆինանսավորմամբ՝
- առնվազն 170 հա տարածքում,
- ինչպես նաև բնական վերաճի օժանդակում հանքայնացման միջոցով և ցանք հարթակներում՝ 40 հա տարածքում։
ՄԱԿ-ի Պարենի և գյուղատնտեսության կազմակերպության (FAO) «Հայաստանում անտառների դիմակայության բարձրացում՝ մեղմացման միջոցառումների շնորհիվ հարմարեցման և գյուղական վայրերում կանաչ տարածությունների ընդլայնման միջոցով» ծրագրի շրջանակում՝ 558.8 հա տարածքում։
«Զանգեզուր» կենսոլորտային համալիր» ՊՈԱԿ-ում
- Էկոլոգիամետ մտածողության ձևավորումը և իրազեկվածության բարձրացումը հասարակության շրջանում բնապահպանական կարևոր միջոցառումների անբեկանելի մասն է։ ՊՈԱԿ-ի մասնագետները մասնակցել են Սյունիք DMO-ում կայացած՝ Ֆրանսիայի AFRAT կազմակերպության էկոլոգիական կրթության մասնագետների հետ հանդիպմանը՝ էկոկրթական ծրագրերի արդյունավետության բարձրացման նպատակով։ Հանդիպմանը մասնակցել են նաև Ֆրանս-հայկական մասնագիտական ուսումնական կենտրոնի, Սյունիք DMO-ի, Վիննեթ Գորիս զարգացման հիմնադրամի ներկայացուցիչները, «Յագոդա մոյա» գլեմփինգի հիմնադիրը։ Հանդիպման ընթացքում ՊՈԱԿ-ի աշխատակիցների կողմից ներկայացվել են կազմակերպության էկոկրթական ծրագրի շրջանակում արծածվող թեմաները, հանդիպումներին կիրառվող մեթոդաբանությունն ու գործիքակազմը, լսարանի սեգմենտավորման, ներգրավման փորձը և իրազեկման արդյունավետության բարձրացմանն ուղղված միջոցառումները։ Կամավորների կողմից կմշակվի նոր բովանդակություն՝ հետագայում էկոկրթական թեմաների շրջանակը ընդլայնելու նպատակով։ Ծրագիրն իրականացվում է Ֆրանսիայի զարգացման գործակալության, ֆրանսիական տեղական ինքնակառավարման մարմինների աջակցությամբ, Ֆրանսիայի AFRAT և Ֆրանս-հայկական մասնագիտական ուսումնական կենտրոն (CEPFA) կազմակերպությունների կողմից իրականացվող՝ «Հայաստանի արահետներ» ծրագրի շրջանակներում։
- ՊՈԱԿ-ի մասնագետները, Բնության համաշխարհային հիմնադրամի (WWF-Armenia) մասնագետների հետ համատեղ, իրականացրել են կենդանական աշխարհի մշտադիտարկման աշխատանքներ՝ ՊՈԱԿ-ի «Զանգեզուր» մասնաճյուղի տարածքում, որի ընթացքում արձանագրվել են ՀՀ Կարմիր գրքում գրանցված Բեզոարյան այծեր։
- ՊՈԱԿ-ի գիտության և զբոսաշրջության բաժնի կողմից իրականացվել է էկոլոգիական մտածողությունը խթանող՝ «Անտառը» թեմայով դաս-պարապմունք՝ Կապանի թիվ 3 նախադպրոցական ուսումնական հաստատությունում, որի ընթացքում ներկայացվել են անտառի հսկաների՝ ծառերի դերը վայրի կենդանիների և մարդու կյանքում, լայնատերև և փշատերև ծառերի առանձնահատկությունները:
«Սևան» ազգային պարկի «Սևան» մասնաճյուղի «Ախթամար» տեղամասում շարունակվում են անտառավերականգնման աշխատանքները՝ 5 հեկտար տարածքում։ Ծրագրվում է տնկել շուրջ 12.000 տնկի՝ հացենի, թխկի, տանձենի, բարդի և ուռենի տեսակների։
Ընթացող անտառվերականգնման աշխատանքներին տեղում հետևել է Շրջակա միջավայրի նախարարի տեղակալ Արամ Մեյմարյանը։