AMX. 2025-ի օգոստոս ամսվա բորսայական տվյալներն ամփոփ
Հայաստանի ֆոնդային բորսան (AMX) ամփոփել է 2025 թվականի օգոստոս ամսվա շուկայական տվյալները։ Ամիսը ցույց է տվել դինամիկ առևտրային միջավայր՝ ընդգծելով ներդրողների աճող վստահությունը և շուկայական ակտիվությունը։
Պարտատոմսերի շուկա
Օգոստոսին Հայաստանի ֆոնդային բորսայի պետական պարտատոմսերի առաջնային աճուրդի հարթակում տեղաբաշխվել է շուրջ 38.6 մլրդ ՀՀ դրամի պարտատոմս: Իսկ երկրորդային շուկայում իրականացվել է 64 գործարք՝ շուրջ 9 մլրդ ՀՀ դրամ ծավալով:
Կորպորատիվ պարտատոմսերի շուկա
Կորպորատիվ պարտատոմսերի շուկայում գրանցվել է առևտրի ծավալի 45% աճ նախորդ տարվա նույն ժամանակահատվածի նկատմամբ՝ կազմելով ավելի քան 6․1 մլրդ ՀՀ դրամ։ Հաշվետու ժամանակահատվածում կնքվել է 843 գործարք՝ օգոստոսի վերջի դրությամբ բորսայում շրջանառվող 163 կորպորատիվ պարտատոմսերով։ Այս կայուն աճը արտացոլում է կորպորատիվ պարտատոմսերի նկատմամբ առողջ պահանջարկը։
Բաժնետոմսերի շուկա
Բաժնետոմսերի շուկայում առևտրի ծավալը կազմել է ավելի քան 228 մլն ՀՀ դրամ, իսկ շուկայի կապիտալիզացիան՝ մոտ 460 մլրդ ՀՀ դրամ*։ Նախորդ տարվա նույն ժամանակահատվածի ցուցանիշի համեմատ առևտրի ծավալը աճել է 49%-ով, իսկ շուկայի կապիտալիզացիան՝ 41.36%-ով։ Բաժնետոմսերով կնքվել է 165 գործարք։
Ռեպո գործարքներ
Ռեպո գործարքների ընդհանուր ծավալը կազմել է ավելի քան 4․9 մլրդ ՀՀ դրամ: Օգոստոսին կնքվել է 46 ռեպո գործարք։
Արտարժույթի շուկա
Օգոստոսին արտարժույթի հարթակում ԱՄՆ դոլարի փոխանակումներն ընդհանուր առմամբ կազմել են շուրջ 2.2 մլրդ ՀՀ դրամ՝ 9 գործարքով։ Ամսվա ընթացքում դոլարի նկատմամբ պահանջարկի փոխարժեքը ձևավորվել է 382.7 – 383 դրամ միջակայքում, իսկ գործարքների միջին կշռված գինը կազմել է 383.10 դրամ։