Ախուրյանի Մայիսյան գյուղում կկառուցվի նոր, ժամանակակից դպրոց

Շիրակի մարզի Ախուրյան համայնքի Մայիսյան բնակավայրում շուտով կբացվի նոր կառուցվող դպրոց․ արդեն մեկնարկել են շինարարության նախապատրաստական աշխատանքները։ Նախագիծն իրականացվում է Հայաստանի տարածքային զարգացման հիմնադրամի պատվիրատվությամբ և ՀՀ կառավարության «300 դպրոց, 500 մանկապարտեզ» խոշորածավալ ծրագրի շրջանակում։

Նոր դպրոցը լիովին կհամապատասխանի ժամանակակից կրթական պահանջներին և կունենա անհրաժեշտ բոլոր պայմանները՝ հարմարավետ դասարաններ, վերանորոգված տարածքներ ու ժամանակակից ենթակառուցվածքներ։ Նախատեսվում է, որ այն կընդունի շուրջ 300 աշակերտ։

Ծրագրի արժեքը կազմում է ավելի քան 2 միլիարդ դրամ։ Ինչպես հայտնում են Ախուրյանի համայնքապետարանից, հին դպրոցի վերակառուցումն անարդյունավետ է համարվել․ շինությունն ու տարածքը չէին բավարարում գործող չափորոշիչներին, այդ պատճառով էլ ընդունվել է նոր դպրոցի կառուցման որոշում։

Նույն ծրագրի շրջանակում համայնքի մեկ այլ բնակավայրում՝ Ղարիբջանյանում, առաջիկայում կմեկնարկի նաև մանկապարտեզի շինարարությունը։ Միաժամանակ, Ախուրյանի մոտ տասը բնակավայրերում ընթանում են դպրոցների ընթացիկ վերանորոգման աշխատանքներ։