Հնդկաստանը հույս ունի, որ Թրամփը ճանապարհ կբացի առևտրային բանակցությունների համար
Հնդկաստանը հույս ունի, որ ԱՄՆ նախագահ Դոնալդ Թրամփը կգիտակցի ռազմավարական գործընկերության կարևորությունը և կբացի ճանապարհ երկու երկրների առևտրային բանակցությունների համար։ Այս մասին ՏԱՍՍ-ին հայտնել է աղբյուր հնդկական կառավարությունում։
«Մենք հույս ունենք, որ Թրամփը կգիտակցի ու կգնահատի մեր ռազմավարական գործընկերությունը, մեր անկեղծությունը և կբացի երկխոսություն առևտրային բանակցությունների համար», – ասել է գործակալության զրուցակիցը։
Նա հիշեցրել է, որ Հնդկաստանի ավանդական արտաքին քաղաքականությունը հիմնված է «բոլորի հետ բարեկամության» սկզբունքի վրա։
«Մենք չպետք է թշնամիներ ունենանք աշխարհի որևէ կետում։ Դա մեր հիմնարար մոտեցումն է», – նշել է նա։
Օգոստոսի 16-ին The Financial Express թերթը գրել էր, որ ամերիկացի բանակցողները չեղարկել են օգոստոսի վերջին նախատեսված այցը Նյու Դելի՝ Հնդկաստանի և ԱՄՆ-ի առևտրային համաձայնագրի շուրջ վեցերորդ փուլի քննարկումների համար։ Այցը պետք է սկսվեր օգոստոսի 25-ին և տևեր մինչև օգոստոսի 30-ը։ Կոնսուլտացիաները պետք է դառնային առևտրային լարվածությունը մեղմելու կարևոր փուլ։
Աղբյուրը նշել է, որ Հնդկաստանը չի կարող դադարեցնել նավթի գնումները Ռուսաստանից՝ հաշվի առնելով «մեծ տարբերությունը՝ ֆինանսական արտահայտությամբ»։