Իսպանական լողափերը հազարավոր տոննա վտանգավոր ջրիմուռներ են գրոհել

Հազարավոր տոննա ինվազիվ Rugulopteryx okamurae ջրիմուռները պատել են Իսպանիայի հարավային ափերը, ներառյալ Կոստա դել Սոլը՝ ոսկեգույն լողափերը վերածելով գորշ թփուտների, գրում է The Guardian-ը։

Գիտնականները նախազգուշացնում են, որ խնդիրը գնալով ավելի է սրվում և բարդանում։

Այս ջրիմուռը, որը ծագումով Ճապոնիայից է, Եվրոպայում առաջին անգամ հայտնվել է մոտ 2015 թվականին։ Այդ ժամանակից ի վեր այն արագորեն տարածվում է՝ դուրս մղելով տեղական ծովային ֆլորան և քայքայելով էկոհամակարգերը։ Rugulopteryx-ի զանգվածային կուտակումը ոչ միայն փչացնում է տեսարանը, այլև վնաս է հասցնում ձկնորսությանը, զբոսաշրջությանը և առափնյա ենթակառուցվածքներին։

Ըստ Science of the Total Environment ամսագրում հրապարակված հետազոտության, գիտնականները պարզել են, որ այս ջրիմուռն ունակ է արտադրել պաշտպանիչ քիմիական նյութեր, որոնք ճնշում են այլ օրգանիզմների աճը՝ դրանով իսկ ամրապնդելով իր գերիշխանությունը։ Հատկապես մտահոգիչ է ջրիմուռի դիմացկունությունը ջերմաստիճանի և աղիության տատանումների նկատմամբ, ինչը թույլ է տալիս նրան գոյատևել ամենատարբեր պայմաններում։

Փորձագետները կոչ են անում անհապաղ միջոցներ ձեռնարկել. անհրաժեշտ են գիտական հետազոտություններ, ջրիմուռների վերամշակում պարարտանյութերի կամ կենսավառելիքի, ինչպես նաև Միջերկրական ծովի երկրների միջև ջանքերի համակարգում։

Ըստ Կադիսի համալսարանի պրոֆեսոր Անխել Սալինասի, «սա ոչ միայն գեղագիտական խնդիր է, այլև էկոլոգիական անհավասարակշռության ազդանշան՝ պայմանավորված կլիմայի փոփոխությամբ և գլոբալիզացիայով»։