Շոգի, ջրի սպառման ծավալների մեծացման պատճառով ջրամատակարարման գրաֆիկի խախտումներ են հնարավոր. Վեոլիա ջուր

«Վեոլիա ջուր» ընկերությունը Երևանի Նոր Նորք, Սարի թաղ, Ջրվեժի Մայակ, Բանավան թաղամասերը, Նորք Մարաշ, Քանաքեռ-Զեյթուն վարչական շրջանների որոշակի հատվածներ, Ջրվեժ գյուղը և ԱԲ1 թաղամասը ջրամատակարաման տեսանկյունից բավականին խոցելի է համարել ու չի բացառել ջրամատակարարման գրաֆիկի խախտումներ: Ընկերության տարածած հաղորդագրության համաձայն` պատճառը հանրապետությունում գրանցված աննախադեպ բարձր ջերմաստիճան է։

«Խնդիրն այն է, որ այս օրերին կտրուկ ավելացել են ջրի սպառման ծավալները, խմելու ջուրը ոռոգման նպատակով օգտագործելու դեպքերը, ինչը համընկել է ջրաղբյուրների ջրատվության նվազման հետ: Նշենք, որ վերը նշված վարչական շրջանները սնվում են բացառապես «Կաթնաղբյուր» ջրատարներից և, տեղանքի առանձնահատկություններից ելնելով, տեխնիկապես անհնար է ջուր մղել այս տարածքներ այլ աղբյուրներից»,– ասված է հայտարարության մեջ:

Ջրամատակարարող ընկերությունը վստահեցրել է, որ ամենօրյա աշխատանք է տարվում ջրի կորուստը նվազեցնելու ու այն համակարգ ներգրավելու համար, աղբյուրներից, նրանց խոսքով, քամվում է ամբողջ ջրաքանակը։