Քննարկվել են Վանաձորի ներհամայնքային երթուղիների սպասարկմանը վերաբերող հարցեր
Լոռու մարզպետի պաշտոնակատար Հովհաննես Ավետիսյանն այսօր խորհրդակցություն էր հրավիրել Լոռու մարզպետի աշխատակազմի պատասխանատու պաշտոնյաների, Վանաձորի համայնքապետարանի առևտրի սպասարկման և տրանսպորտի բաժնի պետ Արման Մովսիսյանի, ՀՀ քաղաքաշինության, տեխնիկական և հրդեհային անվտանգության տեսչական մարմնի Լոռու տարածքային բաժնի, Վանաձորի ներհամայնքային երթուղիները սպասարկող կազմակերպությունների ներկայացուցիչների, ղեկավարների մասնակցությամբ:
Հ. Ավետիսյանը նշել է, որ հանրության կողմից բազմաթիվ դժգոհություններ կան ներհամայնքային երթուղիների սպասարկման հետ կապված:
Նա մասնավորապես անդրադարձել է աշխատանքի ընթացքում վարորդների փոփոխության, վերջիններիս՝ համապատասխան վարորդական իրավունք ունենալու, ժամային գրաֆիկների խախտումների դեպքերին՝ տեղեկացնելով, որ համապատասխան ծառայությունների կողմից այս ուղղությամբ խիստ վերահսկողություն է սահմանվելու:
Քննարկման ընթացքում անդրադարձ է կատարվել նաև տրանսպորտային միջոցների տեխնիկական վիճակին և մի շարք այլ խնդիրների:
Կարևորվել է ներհամայնքային կանոնավոր փոխադրումները կանոնակարգելու, ներհամայնքային փոխադրումների համակարգում բարեփոխումներ իրականացնելու ուղղությամբ առավել ինտենսիվ աշխատանքներ իրականացնելու անհրաժեշտությունը:
Տրվել են հանձնարարականներ: