Երեւանում մեկնարկում է HIF Yerevan 2025 միջազգային ներդրումային ֆորումը
Հունիսի 18-ին Երևանում մեկնարկում է HIF Yerevan 2025 միջազգային ներդրումային ֆորումը, որը հյուրընկալության ոլորտի միտումների քննարկման և ներդրումային համագործակցության առաջատար հարթակ է: Ֆորումը նպատակ ունի խթանել Հայաստանի զբոսաշրջության և հյուրընկալության ոլորտի զարգացումը՝ նպաստելով ներդրումների խթանմանը, ռազմավարական գործընկերությունների ձևավորմանը և կայուն զարգացմանը: Այն նաև կնպաստի Հայաստանը որպես մրցունակ զբոսաշրջային ուղղություն դիրքավորելուն տարածաշրջանային և համաշխարհային քարտեզի վրա:
HIF Yerevan 2025-ը կազմակերպում է Stone Development ընկերությունը: Միջոցառումը բաց է բոլորի համար, մասնակցությունն անվճար է նախապես գրանցված և հաստատում ստացած անձանց համար: Ֆորումն անցկացվում է երկրորդ տարին անընդմեջ, և նախորդ տարվա՝ HIF 2024-ի արդյունքում կնքվել են երկու ներդրումային պայմանագրեր: Այս տարի շեշտը դրվելու է նոր հյուրանոցային նախագծերի իրականացման, ռեզորտային անշարժ գույքի զարգացման, ռազմավարական ներդրումների ներգրավման, թվային լուծումների ներդրման և կայուն զարգացման ստանդարտների ինտեգրման վրա:
Ֆորումին կմասնակցեն գործարարներ և փորձագետներ ԱՄՆ-ից, Մեծ Բրիտանիայից, Ֆրանսիայից, ԱՄԷ-ից, ՌԴ-ից, Չեխիայից, Վրաստանից, Կատարից, Ռումինիայից, Նիդեռլանդներից, Բելգիայից, Շվեյցարիայից, Օմանից և այլ երկրներից: Նրանք կներկայացնեն հյուրընկալության ոլորտի համաշխարհային առաջատար ցանցերը, ինչպիսիք են Accor, Hilton, Hyatt, IHG, Marriott, Radisson և Wyndham-ը: Քննարկումները կենտրոնանալու են Հայաստանում ներդրումային հնարավորությունների, նոր նախագծերի և ոլորտի զարգացման վրա:
Միջոցառմանը ելույթներով հանդես կգան ՀՀ էկոնոմիկայի նախարար Գևորգ Պապոյանը և Հայաստանում ՄԱԿ-ի մշտական համակարգող Ֆրանսուազ Ժակոբը: Հատուկ հյուրերի թվում են JTA International Investment-ի գործադիր տնօրեն Ամիր Ալի Սալեմի Զադեն և Տնտեսական համագործակցության և զարգացման կազմակերպության (OECD) զբոսաշրջության կոմիտեի նախագահ Սերժիո Գերեյրոն: Նրանց ելույթները կդիտարկեն միջազգային համագործակցության միտումները, ռազմավարական ներդրումները, երկարաժամկետ կապիտալի ներգրավումը և կայուն աճի աջակցությունը:
Ֆորումին կմասնակցեն ՀՀ Զբոսաշրջության կոմիտեի, ՄԱԿ-ի Զարգացման ծրագրի հայաստանյան գրասենյակի, Համաշխարհային բանկի (WB), Միջազգային ֆինանսական կորպորացիայի (IFC), Վերակառուցման և զարգացման եվրոպական բանկի (EBRD), Գերմանական միջազգային համագործակցության ընկերության (GIZ), ինչպես նաև առաջատար միջազգային գործարար ասոցիացիաների և ընկերությունների ներկայացուցիչներ: