Ինչպե՞ս կփոխվեն սննդի գները Հայաստանում՝ ԵԶԲ-ի կանխատեսմամբ

Եվրասիական  զարգացման բանկը (ԵԶԲ)  վերջին շաբաթական մակրոտնտեսական վերանայման մեջ կանխատեսում է,  որ Հայաստանում  սպառողական գների տարեկան աճը կկազմի մոտ 3%, մնալով Կենտրոնական բանկի նպատակային միջակայքի սահմաններում՝ 3% ±1%։

 

Ինչ է տեղի ունենում գնաճի մակարդակի հետ ԵԶԲ -ն արձանագրում է, որ 2025 թվականի մարտին Հայաստանում գրանցվել է 3.3% տարեկան գնաճ, մինչդեռ ապրիլին այդ ցուցանիշը փոքր-ինչ նվազել է՝ հասնելով 3.2%-ի ։  Չնայած սա համեստ փոփոխություն է, այն ցույց է տալիս որոշակի կայունացում և դանդաղում գնաճային ճնշումների մեջ։

 

Այս դանդաղման հիմքում ԵԶԲ-ն առանձնացնում է երեք հիմնական ուղղություն.

 

Սննդամթերքի գներ. Ապրիլին աճել են 5.2%-ով, մարտի 5.4%-ի համեմատ։

 

Ծառայությունների գներ. Աճել են 2.7%-ով, մինչդեռ մարտին աճը կազմել էր 2.9%։

 

Ոչ պարենային ապրանքներ. Շարունակել են տարեկան 0.5% անկման միտումը, ինչը պահպանվել է մարտի համեմատ։

 

Այս տվյալները վկայում են, որ գների համապարփակ աճի տեմպերը կայունանում են, ինչը կարևոր է թե սպառողների, թե բիզնես միջավայրի համար։

 

Ինչու է սա կարևոր Հայաստանի համար

Սպառողական գների կայուն աճը նշանակում է, որ գնումների արժեքը կանխատեսելի է մնում, ինչը խթանում է ներդրումները, երկարաժամկետ բիզնես ծրագրավորումը և տնային տնտեսությունների ֆինանսական վստահությունը։ Երբ գնաճը դուրս է գալիս վերահսկողությունից, այն կարող է բացասաբար ազդել սոցիալական ծրագրերի վրա, հանգեցնել վարկերի թանկացման և սպառման կրճատման։ Այդ առումով 3% աճը դիտվում է որպես համարժեք և ընդունելի մակարդակ։

ԵԶԲ-ի դերը տարածաշրջանում

Եվրասիական զարգացման բանկը միջազգային ֆինանսական կազմակերպություն է, որը խթանում է տնտեսական ինտեգրումը և ենթակառուցվածքային զարգացումը իր անդամ երկրներում՝ ներառյալ Հայաստանը։ Դրա կազմում ընդգրկված են Հայաստանը, Բելառուսը, Ղազախստանը, Ղրղզստանը, Ռուսաստանը,  Տաջիկստանը, իսկ վերջին միացած անդամն է Ուզբեկստանը։