Վարչական իրավախախտումների համար տուգանային միավորների խստացումը կընդգծի պետության հասցեական մոտեցումը. Արմեն Խաչատրյան
Տրանսպորտային միջոցներ վարելու իրավունք ունեցող անձին մեկ տարի ժամանակահատվածի համար տրվում է 9 միավոր: Շատ հաճախ, հատկապես, որպես ձեռնարկատիրական գործունեություն, ուղեւորափոխադրմամբ եւ բեռնափոխադրմամբ զբաղվող վարորդներին տրված 9 միավորը չի բավականացնում, ինչը հանգեցնում է առավել ծանր սոցիալական խնդիրների: Այս մասին ասել է ՀՀ ԱԺ պաշտպանության եւ անվտանգության հարցերի մշտական հանձնաժողովի նախագահի տեղակալ Արմեն Խաչատրյանը: Պատգամավորներ Ալեն Սիմոնյանի, Ռուբեն Ռուբինյանի եւ Արմեն Խաչատրյանի հեղինակած «Վարչական իրավախախտումների վերաբերյալ օրենսգրքում փոփոխություններ կատարելու մասին» օրենքի նախագիծն առաջին ընթերցմամբ քննարկվել է ՀՀ ԱԺ մարտի 4-ի հերթական նիստում:
Ներքին գործերի նախարարությունից ստացված վիճակագրական տվյալների համաձայն՝ 2020 թվականից մինչեւ 2024 թվականի մայիսի 31-ը 14.365 վարորդի տուգանային միավորները լրանալու հիմքով տրանսպորտային միջոցներ վարելու իրավունքը կասեցվել է, իսկ նույն տարում կրկնակի կասեցմամբ վարելու իրավունքից զրկվել է 628 անձ:
Առաջարկվող փոփոխությամբ տրանսպորտային միջոց վարելու իրավունք ունեցող անձին մեկ տարվա համար հատկացվում է 13 միավոր: Մանրամասն ներկայացելով առաջարկվող փոփոխությունները՝ Արմեն Խաչատրյանը նշել է, որ վարորդին մեկ տարի ժամկետով տրվող միավորների ավելացումը կթեթեւացնի վարորդների սոցիալական բեռը:
Հիմնական զեկուցողի խոսքով իրավախախտումների համար սահմանված վարչական տույժերը համարժեք չեն դրանց հանրային վնասակարությանը: Ըստ նրա՝ տուգանային միավորի առաջարկվող խստացումները վերաբերում են այնպիսի վարչական իրավախախտումների, որոնց պարագայում իրավախախտման կատարումն ակնհայտորեն չունի սոցիալական համատեքստ, այլ՝ պայմանավորված է մարգինալ վարքագծի շարժառիթներով: Վարչական իրավախախտումների համար տուգանային միավորների խստացումը կընդգծի պետության հասցեական մոտեցումը, կկանխի ռիսկերը, կնպաստի տուգանային միավորների նպատակային կիրառմանը, որը կհանգեցնի ճանապարհային պատահարների նվազման:
Արմեն Խաչատրյանը տեղեկացրել է, որ 2024 թվականին հաշվառվել է 4814 ճանապարհատրանսպորտային պատահար, որի հետեւանքով զոհվել է 333 մարդ, վիրավորվել՝ 6116-ը:
Նախագիծն ընդունվելու դեպքում ուժի մեջ կմտնի 2025 թվականի մայիսի 1-ից:
Հիմնական զեկուցողը պատասխանել է պատգամավորների հարցերին՝ անդրադառնալով ապակիների լուսաթափանցելիության կանոնների խախտմանը, ամրագոտիները չամրակապելու, հեռախոսից օգտվելու, բաժանարար գոտին հատելու, հանդիպակաց երթեւեկության գոտի դուրս գալու, ոչ սթափ վիճակում վարելու դեպքերում սահմանվող տուգանքներին:
Հարակից զեկուցող, Պաշտպանության եւ անվտանգության հարցերի մշտական հանձնաժողովի անդամ Վահագն Ալեքսանյանը ներկայացրել է գլխադասային հանձնաժողովի դրական եզրակացությունը նախագծի վերաբերյալ:
Հարակից զեկուցող, ՀՀ ներքին գործերի նախարարի տեղակալ Արմեն Մկրտչյանը ներկայացրել է Կառավարության դրական դիրքորոշումը՝ նշելով, որ նախաձեռնությունը ծնվել է պետություն-քաղաքացի երկխոսության արդյունքում: Նախագիծը մշակելու ընթացքում նախարարությունը սերտ համագործակցել է օրենսդիր մարմնի գործընկերների հետ:
ՀՀ ԱԺ նախագահ Ալեն Սիմոնյանը ելույթում նշել է, որ օրենսդրական նախաձեռնության գաղափարն առաջացել է վարորդների խնդրանքով: ԱԺ նախագահի խոսքով ազդանշանների հարցը եւս պետք է կանոնակարգվի՝ առաջարկելով խստացնել եւ համակարգված լուծում տալ:
Ելույթներում պատգամավորները կարեւորել են նախագծի ընդունումը` ընդգծելով, որ ոլորտն ուսումնասիրելու եւ համակարգված լուծում տալու անհրաժեշտություն կա:
Եզրափակիչ ելույթում ՀՀ ներքին գործերի նախարարի տեղակալն անդրադարձել է պատգամավորների հնչեցրած հարցերին, դիտարկումներին: Նա նշել է, որ տեսահսկման համակարգի զարգացումը բավականաչափ կօգնի տվյալները հավաքագրելու հարցում: