Հունվարին Մեծ Բրիտանիայում բնակարանների գներն աճել են վերջին վեց ամսվա նվազագույն չափով

Մեծ Բրիտանիայի բնակարանների գները հունվարին տարեկան կտրվածքով աճել են 3%-ով, ինչը հուլիսից ի վեր ամենադանդաղ տեմպն է: Այս մասին հայտնել է անշարժ գույքի խորհրդատվական Halifax ընկերությունը:

Դեկտեմբերին, ըստ վերանայված տվյալների, աճը կազմել է 3.4%, ոչ թե 3.3%, ինչպես նախապես հայտարարվել էր:

Ամսական կտրվածքով գներն աճել են 0.7%-ով՝ դեկտեմբերին 0.2% անկումից հետո:

Արդյունքում՝ երկրում անշարժ գույքի միջին գինը հասել է նոր ռեկորդի՝ 299.138 ֆունտ ստեռլինգ (372.9 հազար դոլար):

Բնակարանների գներն ամենաշատն աճել են Հյուսիսային Իռլանդիայում՝ 5.9%-ով: Լոնդոնը գրանցել է 2.8% աճ, ընդ որում՝ մայրաքաղաքը մնում է Միացյալ Թագավորության ամենաթանկ բնակարանային շուկան, իսկ տան միջին գինը կազմում է 548.300 ֆունտ ստեռլինգ, որը գրեթե կրկնակի է ազգային միջինից: