ԱՄՀ մշտական ներկայացուցչի հետ քննարկվել է ՀՀ-ում լոգիստիկ կենտրոնների ստեղծումը

Նախարար Գևորգ Պապոյանը փետրվարի 5-ին ընդունել է Հայաստանում Արժույթի միջազգային հիմնադրամի (ԱՄՀ) մշտական ներկայացուցիչ Ումանգ Ռավաթին։ Հանդիպմանը ներկա են եղել նաև նախարարի տեղակալներ Նարեկ Հովակիմյանը և Լիլյա Սիրականյանը։

Գևորգ Պապոյանը կարևորել է ԱՄՀ-ի հետ համագործակցությունը, ներկայացրել տնտեսական վերջին զարգացումները և իրականացվող քայլերը։

 Հանդիպման ընթացքում կողմերը քննարկել են երկուստեք հետաքրքրություն ներկայացնող հարցերի լայն շրջանակ, մասնավորապես ՝ անդրադարձել են արտահանման ռազմավարության տեսլականին, կորպորատիվ կառավարման վերաբերյալ պետական քաղաքականության հիմնադրույթներին, ներդրումների արդյունավետ կառավարմանը։

Առանձին անդրադարձ է կատարվել նաև Հայաստանում նախատեսվող միջազգային չափանիշներին համապատասխան արդյունաբերական գոտիների և լոգիստիկ կենտրոնների ստեղծմանը։

Կողմերը կարևորել են փորձի և գիտելիքների փոխանակման անհրաժեշտությունը, ինչը կնպաստի Հայաստանում տնտեսական քաղաքականության ձևավորմանը և կառավարման համակարգի ամրապնդմանը։