Հանդիպում ֆինանսական շուկայի մասնակիցների հետ

ՀՀ ֆինանսների նախարարության պետական պարտքի կառավարման վարչության մասնագետները հանդիպում են ունեցել ֆինանսական շուկայի մասնակիցների՝ բանկերի, կենսաթոշակային ֆոնդերի, Հայաստանի ֆոնդային բորսայի, ինչպես նաև ներդրումային և ապահովագրական ընկերությունների և այլ ֆինանսական կազմակերպությունների ներկայացուցիչների հետ:

Հանդիպման ընթացքում պետական պարտքի կառավարման վարչության պետ Սամվել Խանվելյանը և նույն վարչության ռազմավարության և ռիսկերի կառավարման բաժնի պետ Մարինե Մելիքյանը մասնակիցներին ներկայացրել են 2025թ. փոխառությունների տարեկան ծրագիրը:

Մասնավորապես՝ ներկայացվել են 2025թ. հարկաբյուջետային շրջանակը, համախառն ֆինանսական կարիքն ու պետական բյուջեի պակասուրդի ֆինանսավորման աղբյուրները, պետական բյուջեի պակասուրդի ֆինանսավորման պարտքային գործիքակազմը, կառավարության պարտքը և դրա կառուցվածքը 2025թ. տարեվերջին, ուղենշային ցուցանիշները, պետական գանձապետական պարտատոմսերի տեղաբաշխման աճուրդների օրացույցը:

 ՀՀ ֆինանսների նախարարության ներկայացուցիչները պատասխանել են քննարկման շրջանակներում մասնակիցների կողմից բարձրացված հարցերին: