Իրանական գազի արտահանումը Հայաստան մոտ ժամանակներս կկրկնապատկվի. ԻԻՀ դեսպան

Իրանական գազի արտահանումը Հայաստան մոտ ժամանակներս կկրկնապատկվի։ Այս մասին իրանական SNN գործակալությանն ասել է ՀՀ–ում Իրանի արտակարգ և լիազոր դեսպան Մեհդի Սոբհանին։

Նա հիշեցրել է, որ մեկ տարի առաջ Հայաստանն ու Իրանը երկարաձգեցին «Գազ Էլեկտրաէներգիայի դիմաց» համաձայնագրի գործողությունը մինչև 2030 թվականը: Ամեն տարի Թեհրանը Հայաստան է արտահանում 360 մլն խմ գազ, իսկ փոխարենը ներկրում էլեկտրաէներգիա։

«Մեզ հաջողվել է նաև գրեթե եզրափակիչ փուլ հասցնել Հայաստանից Իրան էլեկտրահաղորդման երրորդ գծի կառուցման աշխատանքները, որը շահագործման կհանձնվի առաջիկա մի քանի ամսվա ընթացքում։ Արդյունքում մենք կկարողանանք կրկնապատկել Հայաստանից էլեկտրաէներգիայի ներկրումը»,– ասել է դեսպանը:

Սոբհանին նաև նշել է, որ առևտրի ոլորտում հաջողվել է Հայաստանի հետ ապրանքաշրջանառությունը հասցնել 711 մլն դոլարի. օրական շուրջ 400 բեռնատար է երթևեկում երկու երկրների միջև:

Սկզբունքային մոտեցում կա, որը չի փոխվի` ով էլ որ գա իշխանության Իրանում ու ՀՀ–ում. Սոբհանի

Դեսպանն ընդգծել է, որ Հայաստանն Իրանի համար կարևոր շուկա է, քանի որ ԵԱՏՄ անդամ երկիր է:

«Իրանի և Հայաստանի միջև հարաբերություններն առանձնահատուկ նշանակություն ունեն աշխարհագրական և ռազմավարական դիրքի արդյունքում։ Երկրների միջև սահմանը 46 կմ է, ինչը կենսական դեր է խաղում տարածաշրջանային անվտանգության ամրապնդման գործում»,– նշել է Սոբհանին։

Իրականացվող համատեղ նախագծերի թվում նա առանձնացրեց ենթակառուցվածքների և էներգետիկայի ոլորտում իրականացվող ծրագրերը, ինչպիսիք են ճանապարհների կառուցումը և գազի, էլեկտրաէներգիայի փոխանակման ծրագրերի ընդլայնումը և այլն: Նա շեշտում է, որ մշակութային և կրթական փոխգործակցությունը հանգեցնում է երկու ժողովուրդների միջև բարեկամական հարաբերությունների խորացմանը:

Աղբյուրը՝     arm.sputniknews.ru