Արեգնադեմ բնակավայրում ընթացքի մեջ են դպրոցի մոդուլային շենքի կառուցման աշխատանքները

Քաղաքաշինական ծրագրերի վերահսկողության մշտադիտարկման աշխատանքային խումբը Շիրակի մարզպետի տեղակալ Աննա Մարտիկյանի գլխավորությամբ նախօրեին այցելել է «Արեգնադեմի միջնակարգ դպրոց»՝ դիտարկելու դպրոցի շենքի շինարարական աշխատանքների ընթացքը։

Մարզպետի տեղակալը շրջել է դպրոցում, զրուցել շինարարի հետ, տեղեկացել արված աշխատանքների մասին։ 

Ծրագրի ընդհանուր արժեքը կազմում է 748 մլն 540 հազար դրամ, 2024 թվականի պետական բյուջեով նախատեսվել է 390 մլն 485 հազար դրամ։  

Ուսումնական հաստատությունն ունենալու է բոլոր հարմարությունները՝ փակ մարզադահլիճ, բաց մարզադաշտ, արևային ֆոտովոլտային կայան, ապահովված է լինելու ապաստարանով: 

Մարզպետի տեղակալը շինարարների հետ զրույցում ընդգծել է, որ ամեն ինչ պետք է արվի շինարարության որակն ապահովելու համար՝ փոխանցելով մարզպետի հանձնարարականը՝ զերծ մնալ թերացումներից ու աշխատանքների անհարկի ձգձգումներից։