2022-ի փետրվարի վերջից Ուկրաինան ԱՄՆ-ից ստացել է մոտ 23 միլիարդ դոլարի բյուջետային օգնություն
Պաշտոնական Վաշինգտոնը 2022 թվականի փետրվարի վերջից մինչ օրս Կիևին տրամադրել է մոտ 23 միլիարդ դոլարի բյուջետային օգնություն։ Այս մասին հայտարարել է Ուկրաինայի ֆինանսների նախարար Սերգեյ Մարչենկոն։
«2022 թվականի փետրվարի 24-ից ԱՄՆ-ից ստացված բյուջետային աջակցության ընդհանուր ծավալը կազմում է շուրջ 23 միլիարդ դոլար։ Հավաքագրված միջոցները զգալի ներդրում են ունեցել մեր երկրի ֆինանսական համակարգի կայունության գործում», – ասել է ուկրաինացի պաշտոնյան:
Վաշինգտոնում ԱՄՆ ֆինանսների փոխնախարար Ջեյ Շամբոյի հետ հանդիպման ժամանակ Մարչենկոն նաև ասել է, որ Ուկրաինայի համար «չափազանց կարևոր» է պահպանել ԱՄՆ-ի օգնությունը:
«Մենք ակնկալում ենք, որ Միացյալ Նահանգների Կոնգրեսը որքան հնարավոր է շուտ համապատասխան որոշում կկայացնի՝ հավանություն տալու Ուկրաինային 2024 թվականի օգնության փաթեթին»,- հավելել է նա։
Ընթացիկ տարում Ուկրաինային անհրաժեշտ է 37.2 միլիարդ դոլար արտաքին ֆինանսավորում, որից 10.2 միլիարդ դոլարը Կիևն արդեն ստացել է։
Աղբյուրը՝ b24.am