Փոփոխություններ եւ լրացումներ են նախատեսվում «Լիցենզավորման մասին» եւ «Փոստային կապի մասին» օրենքներում
Օրենսդրական փաթեթով նախատեսվում է համապատասխան իրավական հիմքեր ստեղծել օտարերկրյա պետություններից փոստային եւ սուրհանդակային գործունեություն իրականացնող անձանց կողմից ներմուծվող ապրանքների վերաբերյալ տեղեկությունների հավաքագրման եւ մաքսային մարմիններին ներկայացման համար: Համապատասխան տեղեկությունների հավաքագրման եւ մաքսային մարմիններին փոխանցման արդյունավետության ապահովման նպատակով նախագծերով սահմանվում են նաեւ փոստային եւ սուրհանդակային գործունեություն իրականացնող անձանց տեղեկատվական համակարգերին ներկայացվող պահանջներ եւ տեղեկությունների ցանկի սահմանման իրավասություն: Նախատեսվում է նաեւ համապատասխան տեղեկությունների՝ մաքսային մարմիններին չներկայացումը սահմանել որպես համապատասխան գործունեության լիցենզիայի կասեցման հիմք:
««Լիցենզավորման մասին» օրենքում փոփոխություն եւ լրացումներ կատարելու մասին» եւ ««Փոստային կապի մասին» օրենքում լրացումներ կատարելու մասին» օրենսդրական փաթեթն ԱԺ տնտեսական հարցերի մշտական հանձնաժողովի հերթական նիստում առաջին ընթերցմամբ քննարկման է ներկայացրել ՀՀ պետական եկամուտների կոմիտեի նախագահի տեղակալ Ծովինար Սողոմոնյանը:
Նախագծերի ընդունման արդյունքում ակնկալվում է մաքսային հսկողության արդյունավետության բարձրացում՝ նախապես հավաքագրվող տեղեկությունների վերլուծության հանգամանքով պայմանավորված, ինչի արդյունքում կապահովվի մաքսային մարմինների կողմից կիրառվող ռիսկերի կառավարման համակարգի օգտագործմամբ թիրախային հսկողության իրականացումը, որի արդյունքում նաեւ կպարզեցվեն ապրանքների մաքսային ձեւակերպումների գործընթացները, կկրճատվի մաքսային ձեւակերպումների ժամանակահատվածը եւ կապահովվի ապրանքների՝ պարզեցված ընթացակարգերով բացթողումը:
Հանձնաժողովը նախագծին դրական եզրակացություն է տվել: