Մարզահամերգային համալիրի վերակառուցվող ճանապարհը թույլ կտա միջոցառումների ժամանակ զերծ մնալ խճողումներից. Քաղաքապետարան
Երևանի քաղաքապետարանից, որպես իրազեկում, հայտնում են հետևյալի մասին․
Հարգելի՛ համաքաղաքացիներ,
ի պատասխան Մարզահամերգային համալիրի վերակառուցվող ճանապարհի բազմաթիվ հարցադրումների՝ հարկ ենք համարում տեղեկացնել.
1․ Ճանապարհի կառուցումն առաջարկվել է «Կարեն Դեմիրճյանի անվան մարզահամերգային համալիր» ՓԲԸ-ի տնօրինության կողմից։ Այն հնարավորություն կտա միջոցառումների և արտակարգ իրավիճակների ժամանակ զերծ մնալ խճողումային երևույթներից, իսկ դժբախտ պատահարների դեպքում՝ մարզահամերգային համալիրից մարդկանց ավելի արագ տարհանել անվտանգ տարածք, ինչպես նաև շտապօգնության և հրշեջ-փրկարարական ջոկատի մեքենաները հնարավորություն կունենան լրացուցիչ ճանապարհով մուտք ունենալ Մարզահամերագային համալիրի տարածք։
2. Հարկ ենք համարում ընդգծել, որ նոր կառուցվող ճանապարհով մեքենաների երթևեկությունը թույլատրվելու է բացառապես Մարզահամերգային համալիրում միջոցառումների ժամանակ, ինչպես նաև՝ արտակարգ դեպքերում։
3․ Ճանապարհի շինարարական աշխատանքների ձեռքբերումն իրականացվել է ՀՀ օրենսդրությանը համապատասխան՝ «Գնումների մասին» օրենքով սահմանված կարգով։ Նախագիծը ստացել է դրական եզրակացություն: